小娜執媽的部落格

嘩!!!最近最HIT話題莫過於YAHOO BLOG要摺啦!!!!
嘩~ 死啦! 我雖然係一個懶Blogger，但7年啦，唔多唔少都有d貨仔!!要搬屋真係唸起都頭痕!!!
矛盾!!!到底都仲寫唔寫? 我唔係人氣blogger，應該摺左都唔會太多人傷心! 但我又好唔捨得d blog文，話哂都係我既"那些年"，有好多回憶!
 有時響度呻兩句都好oY，起碼唔駛下下屈住!!! 而家唔知何去何從啦。。。。。不如大家比D意見啦!
1。繼續寫，但係去邊度好呢?
2。同YAHOO BLOG摺埋
3。寫FACEBOOK PAGE or 微博?
4。1+3?
真係走的終需走。。。。唔捨得都要LET GO!!
如果大家無緣再見，我地一家祝所有黎過，留過腳毛既Blog友仔生活快樂，身體健康!

出發啦!!!今次係Kori第二次去LV

Natto話要幫手拎行李

各位好嗎? 我返來啦~~~真係好一個又忙又痛既6，7月!!
報告下先!! 六月小妹master畢業既家庭之旅順利完結!! 從未試過handle十幾人既旅行團，在於一個有人流恐懼症既我總算表現不過不失，大家都玩得好開心，盡興
而歸!到7月啦!適逢悶蛋國既國慶日，我地一家四口去左Las Vegas 玩左四日三夜!盡情玩盡情食，因為玩完之後我要做一個小手術!
話 說幾個月前有一次返返下工，突然肚痛到行唔郁要落樓下ER，結果發現原來有個不速之客，靜靜地搬左黎我度住唔話我知!!! 都市人病: 膽石!!!! 頂~唔怪之得之前時不時會胃痛到發顛，原來係你!!! 見過醫生後，醫生建議我割~~~~~膽~~~~~~~!!!! 下~~唔係割石就得架咩? 醫生話有過膽石既人覆發機會高，免得下次又有又要再受皮肉之苦!長痛不如短痛啦!! 醫生話我亦可選擇唔做手術，等佢下次再痛D先做，我同豆爸都覺得無謂擺個計時炸蛋響身!萬一個接緊仔時痛點算? 萬一響屋企無人得我同Kori響樹時痛邊個救我? 都係快快手同佢分手!
不過事情都唔係甘簡單!! 大家都知我有個唔多好既老闆，佢差d唔比我做手術!又話唔夠人又過多同事暑假放假，bla bla bla!! 萬一我膽管塞左發炎點先? 萬一我返工痛到暈左點先? 唉~呢d人，完全只有rules & policy，一d人情味都無! 由頭到尾一句問候都無，只係擔心我幾時可以返工!!
我有對仔女，有個家，無野緊要得過健康!我睬佢都有味，決定做手術，最多唔撈架je!!
手術前一晚，我其實好驚!!雖然只係一個小手術，但點都好記掛對仔女，仲有老公!!加上Natto呢幾日扭計唔食飯，攪到我喊到豬頭甘!!好彩有豆爸安慰!!唉~~人越老
越怕死!!其實死唔可怕，最可怕係再見唔到你愛既人~雖然我地每個人都注定一個人黎一個人走。。。。。。
因為醫學進步，而家割膽手術只需要微創就得架啦! 響肚度開四個窿，手術過程一個鐘鬆d!不過就要插喉全身麻醉!! 手術順利，不過老實講痛過生仔!!!我全身感覺比人打左一身，五臟六腑比郁過哂甘，好辛苦!! 我寧願生仔好過!!!
出院後，多謝豆爸同我奶奶湊住兩隻小鬼，我先可以好好休息!!不過最近Natto好扭計，半夜成日醒要人陪訓!!!辛苦左豆爸爸!!~~
小病是福，更加令我感受到家人同朋友對我既關心!! 希望快d好返，因為我有好多野想食呀!!!!

潛水已經成為我呢個全職媽+半職女工既慣常動作!! 之前因為D yen 跌，攪到我呢個敗家媽媽又再失控，瘋狂地上日本Website買野比對仔女!! 我唸有響日本website
買過野既blog友仔都知，日本d site買野幾鬼麻煩，又要翻釋又鬼甘多靚野，攪到我一睇一買就一日啦! 總算幫佢地換左季!
至 於返工方面，我雖然仍然係一個禮拜返兩日，但唔知點解最近好似返得好密甘，攪到好早就訓左!!成日比豆爸話我渴睡，訓十幾個鐘!! 哈哈~基本上我每日暗女訓時(九點 幾)自己都訓埋，第朝7點起身陪仔食早餐!下個月家妹master畢業，又將會有十幾個親戚黎，又要Plan行程，又要做導遊，睇怕我又會再潛水架啦!!
最近返工成日遇到d "lucky case"!!! 不如講黎嚇下大家!!!!! (怕核突者慎入!!)
恐怖case 1: 生出蟲來
有 一個由中美洲一個比較落後既媽媽黎生仔，當佢push B出黎個刻痾出一舊拳甘大既"黃金" 出黎!!大家生過既媽媽都知，生產時候要push 個下力，分分鐘大小便齊出埋架嘛，呢個情況基本上對我黎講已經係家常便飯，但最嘔既係"舊金"上面有條勁大既白色生歐歐寄生蟲!!-__-!! 痾出黎個下所有醫生同護士都嚇呆左!!
恐怖case 2: 勤力開工，險爆子宮
有睇開我早期blog 既blog友仔都知道我比較鼓勵自然生產，因為開刀生的確比順產危險得多!有一個媽媽，十個月前先開刀生第一胎!生完後，月都未坐完又再懷孕，結果兩胎相 差只係慬慬十個月! 打開個肚後，又係成team 醫生護士呆左!!! 因為個媽媽個子宮已經簿到好似一個吹到就黎爆既汽球甘，簿到己經見到成個羊膜，見埋BB個頭啦!! 相信如果呢個媽媽一作動，子宮一收縮，個子宮一定會爆，隨時媽媽同BB都有生命危險!!所以開刀生完之後至少等半年先好再開工呀!!
恐怖case 3: 真爆子宮
又 係開刀case，第二胎! 不過今次媽媽選擇順產!! 基本上媽媽己開到10cm，但BB頭仔仲係高，所以Push左好耐都未生得出!! 個媽媽又唔識push，又唔比開燈又唔比我地開bb monitor個volume，攪到我地好難聽到bb心跳情況!! 結果真係出事，一個push，bb 心跳急降，攪到我地飛奔入手術室開刀!! 一開子宮，點解見唔到BB個頭?? 正常一開子宮就會見頭! 個手術醫生係甘摷係甘摷都搵唔到BB個頭!摷到大小腸都出哂黎，血肉橫飛!!原來媽媽個子宮響push既過程中爆左，BB 已經爆出子宮外!!我地呢D見慣大場面既都嚇到面青!! 唉~ 真係"登"個媽媽傷!!好彩BB搶救後都救得返!!

印象中甘大個人返鄉下次數少過十次，因為以前鐵路未係好發達，回鄉起碼要搭8個鐘頭夜火車先到，所以唔會成日返! 最近一次係我結婚後，帶豆爸回鄉見我爺爺麻麻!本來生左Natto後想帶佢返去見下太爺太麻，不過佢地等唔到我地，前年已經去左仙遊啦! 今年難得我爸爸得閒，可以陪我返鄉下，機會難得，所以就算豆爸不在身邊，我都膽粗粗甘拖住兩隻小鬼返鄉下!!而家有左高鐵，原本8個鐘車程，4個鐘唔駛就 到啦，方便好多!! 加上高鐵都算新，車廂各樣設備都仍然好新，所以整個路程都坐得好舒服!!我爸爸為左佢兩粒孫舒服，訂左商務席!由於好少內地人會坐，我地幾乎包廂!

我都係第一次搭高鐵

 
閒時weekend，我地都無咩節目架!簡簡單單帶佢地去公園,研究下地下d樹葉，果實....佢地執到地下既果實我地
會順便做下教育，話比佢地知呢d咩黎既! 無興趣班無playgroup無野學，但係一家人一齊就已經最開心^_^

當初選擇做護士，其中一個原因係因為我唔鍾意辦公室政治!另外我個人比較內向，又唔鍾意埋堆，好怕是非!我以為 做護士應該就無呢D煩惱，大家各做各，又唔會爭做charge(因為做charge好多野煩，又要應付醫生，病人，仲有醫院老闆)!!原來唔係，醫院政治 仲恐佈!!!
最近工作真係有d唔開心!!本來我返part-time，一星期兩日，響ward黎講直頭係閒人，做完野就閃人架啦! 自從產房換左近新主管後，不停有好多是是非非話老細唔鍾意非白人，好想剷除我地呢班 minority!!! 事實上佢亦不停請新人，new grad個種新仔(我地產房行內好少請新仔，因為產房屬專科，入得黎做一定要有返少少經驗先應付到)，九成以上都係白人!! 其實咩人種對我黎講都無所謂，我自己都做過新仔，好明白新人都需要落場train先會有經驗!! 但好衰唔衰呢班新仔，大部份都係自我中心爆棚既白人，講白d，即係佢地唔鍾意我地呢d minority，歧視非白種人!!! 唔會主動幫忙之餘，亦時常狗眼看人低甘，所以我遇著同佢地同一更返工我就超無癮! 不過呢d都係小事!! 最近老細主動出擊想踢走我地 d minority， 專搵我地錯處，然後大做文章，更加上告大老細!!! 唉~~真係做到好無癮!!! 有d比較敢言既同事更加差d比佢迫走，攪到成個ward人心惶惶! 最近因為食飯休息既問題，攪到要搵公會幫手，而家日日返工除左要應付病人，醫生外，仲要好似要同老細抗衡甘，超無歸屬感，好想唔做!
加 上最近Natto 同Kori都相繼病左，感冒菌入腸，攪到又痾又嘔又唔肯食野!!我終於頂唔順，進入崩潰狀態!! 有一日餵Natto食飯，佢又扭計，我當下一刻覺得好累，好似永遠有做唔完既野，又樣樣野做得唔好，好辛苦，好灰，差d想死左去就算!! 我終於忍唔住喪喊左一大輪，嚇到Natto問我"咪咪，做咩野呀??" ，我老公見到我都嚇親，猛甘問係咪Natto激親媽咪!!! 喊完一輪，終於好返好多啦!! 
好多謝豆爸爸既支持同包容!! 相信佢既壓力同疲勞程度都唔比我少，但每次我崩潰時都係佢橕我!有次比老細照肺好唔開心，豆爸爸一句"你最壞情況都係留返響屋企打我份住家工同每日對住兩 隻小魔怪之嘛，無咩大不了!" 我好感動，起碼無論咩事，身邊總有個人支持同Back up你!!!
人生總有高低，我相信低潮好快過!!  大家一齊努力啦!!加油!!

你睇我個樣殘到哩!!一個人湊仔真係好辛苦!!!

 

帶住兩隻小鬼既我，得兩隻手但要照顧四隻小手，所以今次真係影得好少好少相!!! 唔係掛住拖實佢地就係推B車，真係有手都留返黎夾野食啦!!不過唔駛影相反而多左時間同朋友或者親人傾計，都唔係壞事!
唔講啦，去相!!
要讚下Natto先!!因為我唔敢三個人同床，因為怕迫到是但一個，好驚佢地碌左落床我都唔知，所以問屋企人借左張網床放左響廳比Natto訓，而我就同Kori訓房!Natto全程做廳長都無扭計，晚晚自己乖乖訓覺!!

Natto好鍾意飛機，成日都話要坐，所以佢好happy!!

小朋友上機必備用品，DVD，卡通片