小娜執媽的部落格

當初選擇做護士，其中一個原因係因為我唔鍾意辦公室政治!另外我個人比較內向，又唔鍾意埋堆，好怕是非!我以為 做護士應該就無呢D煩惱，大家各做各，又唔會爭做charge(因為做charge好多野煩，又要應付醫生，病人，仲有醫院老闆)!!原來唔係，醫院政治 仲恐佈!!!
最近工作真係有d唔開心!!本來我返part-time，一星期兩日，響ward黎講直頭係閒人，做完野就閃人架啦! 自從產房換左近新主管後，不停有好多是是非非話老細唔鍾意非白人，好想剷除我地呢班 minority!!! 事實上佢亦不停請新人，new grad個種新仔(我地產房行內好少請新仔，因為產房屬專科，入得黎做一定要有返少少經驗先應付到)，九成以上都係白人!! 其實咩人種對我黎講都無所謂，我自己都做過新仔，好明白新人都需要落場train先會有經驗!! 但好衰唔衰呢班新仔，大部份都係自我中心爆棚既白人，講白d，即係佢地唔鍾意我地呢d minority，歧視非白種人!!! 唔會主動幫忙之餘，亦時常狗眼看人低甘，所以我遇著同佢地同一更返工我就超無癮! 不過呢d都係小事!! 最近老細主動出擊想踢走我地 d minority， 專搵我地錯處，然後大做文章，更加上告大老細!!! 唉~~真係做到好無癮!!! 有d比較敢言既同事更加差d比佢迫走，攪到成個ward人心惶惶! 最近因為食飯休息既問題，攪到要搵公會幫手，而家日日返工除左要應付病人，醫生外，仲要好似要同老細抗衡甘，超無歸屬感，好想唔做!
加 上最近Natto 同Kori都相繼病左，感冒菌入腸，攪到又痾又嘔又唔肯食野!!我終於頂唔順，進入崩潰狀態!! 有一日餵Natto食飯，佢又扭計，我當下一刻覺得好累，好似永遠有做唔完既野，又樣樣野做得唔好，好辛苦，好灰，差d想死左去就算!! 我終於忍唔住喪喊左一大輪，嚇到Natto問我"咪咪，做咩野呀??" ，我老公見到我都嚇親，猛甘問係咪Natto激親媽咪!!! 喊完一輪，終於好返好多啦!! 
好多謝豆爸爸既支持同包容!! 相信佢既壓力同疲勞程度都唔比我少，但每次我崩潰時都係佢橕我!有次比老細照肺好唔開心，豆爸爸一句"你最壞情況都係留返響屋企打我份住家工同每日對住兩 隻小魔怪之嘛，無咩大不了!" 我好感動，起碼無論咩事，身邊總有個人支持同Back up你!!!
人生總有高低，我相信低潮好快過!!  大家一齊努力啦!!加油!!

人生其實都幾多大大少少o既煩惱!! 細個時候o既煩惱大多數係驚測驗考試溫唔哂書做唔完功課會比先生罰，考得唔好會比呀媽炳! 到再大D啦，開始拍拖談戀愛又會煩同男朋友嘈交或者其他感情問題，最多就搵朋友訢苦，但係要解決的問題始終要靠自己!!
我好慶幸結婚之後，我o既煩惱負擔終於有個人同我一齊分擔，一齊解決!! 其實我都唔算有咩大煩惱o既人，屋企經濟無問題，娘家唔需要我養! 做野係辛苦d，不過都係一個禮拜兩日! 兩個小朋友仲細，要我擔心既都莫過於唔舒服，唔飲奶，唔食野!
其 餘要煩o既就一定係我地個(大(屋)仔!! 佢年紀唔算細，成日都有d小毛病大毛病要我地搵人醫佢!一睇醫生又千千聲(美金wor!!!!!) 之前天花漏水攪到我成日發惡夢，夢見自己間屋漏水漏到穿左個大窿，直頭住唔到人! 最近Natto間房又滲水，攪到長身發霉又要整!!! 真係永遠有整不完o既野!!
住外國雖然係地方大，不過屋仔有事上黎真係令人好頭痛!! 另外我最討厭同最唔鐘意就係搵租客， manage出租物業真係好鬼煩，萬一遇到惡租客就慘啦，麻煩到上腦!! So far 我地d租客都ok，不過成日要搬，住唔長，攪到我地成日要搵新租客!!  呢d小事加加埋埋就係令我心煩意亂，本來好興奮就快見返Natto架麻，而家硬係有d野煩!
好彩我個"伴" 幫我分擔下呢d佢唔覺得係煩野o既煩野!!佢個人比較樂觀，唔唸多餘野，比較正面面對一d負面o既事，所以有佢響樹back up我，我就多返好多安全感，起碼知道自己唔係得一個人面對所有野!! 所以大家要好好珍惜身邊個"老伴"，第日老左唔好唸住可以靠仔女(有得靠當然好) 佢地大個就會有自己o既家庭自己o既世界，長大離開父母係正常不過o既事! 年老後，剩底陪自己過埋下半世o既就只有呢個"伴" ，所以我好珍惜佢架，雖然我表面好似唔係!!

o禽日同Natto視象，佢指住個Mon，用一個疑惑o既眼光望住我地，好似有點想喊，又好似有D嬲嬲地! 唉。。。。睇到我地好難過呀! 我相信佢o甘細個應該唔會覺得係爸爸
媽媽掉低佢唔理，不過我真係好掛住佢!! Natto爸都好失落，大家雖然見到個仔，但係心裡都係酸流流! 之後我問佢下次如果屋企人話要湊natto/kori 幾個月得唔得
? 佢話唔得! 我o既答案都一樣係:唔得!!!
或者從未分離過就唔知道分離o既不捨!!有d野大家可能太過take it for granted! 有o既時候唔珍惜，總係覺得身邊擁有o既野永遠都會響自己身邊，或者覺得有好過無!!原來失去o既時候自己接受唔到!
講到有d離哂題，不過我想講無論係情侶，朋友，屋企人，仔女或者係兩夫妻都係一樣，要珍惜眼前人!
當你覺得你另一半好煩，又唔夠細心又唔浪漫時﹔當你覺得你爸爸媽媽日鵝夜鵝好鬼煩時﹔當你覺得每日要湊仔湊女餵奶餵飯換片陪讀書陪學野好辛苦時，大家唸下如果聽日就係世界末日，我地仲可以對住佢地幾耐呢?
珍惜，知足常樂!
唸深一層，其實自己已經好幸福架啦!

回想起結婚當日，我個MC問我想婚後既生活係點?我唸都無唸就答佢"唔駛做"!!哈哈~
其實做全職媽媽(應該話係唔駛返工)係我既Ultimate goal! 不過現實生活中，唔係想就可以做到!雖則我慳慳地唔食o甘多日本野，唔去o甘多旅行，我老公應該都養到我
地幾口!! 但係全家都覺得我而家做part time，一個禮拜返兩日工，根本無必要完全唔做野，驚我同社會脫節(其實驚我太多時間無聊煩住佢，嘿!!) 加上一個人"咩
"一頭家真係好辛苦，我都唔想我老公太辛苦，所以我的少奶奶夢碎!!(生左兩件，都無得做少奶架啦，唔變肥師奶都偷笑)
但我其實心裡係80%唔想返工，第一我懶(主要原因，嘿~)第二我唔知點解覺得返工好有壓力，每次放工個人都散哂，咩都做唔到!第三，我唔駛捨得我兩個寶貝，因為
我一返就返13個鐘，放工食個飯後都死得，陪唔到佢地玩! 所以我一直唸有咩辦法可以留響屋企，但又可以賺錢!!
之前有唸過做代購，因為自己都鍾意買野，特別係小朋友野! 上年返香港後，發覺香港D小朋友野真係又貴又唔抵!連花園街D野都唔係話好平! 其實悶蛋國特價起上
黎，仲平過香港花園街好多，仲要質料都好好多! 於是睇其他人o既代購網，發覺都收得唔平，食水好深下!  唸下唸下做代購會唔會賺到錢呢?
但我老公一盤冷水淋我，話我個人self motivation好低，一定唔係生意o既人!!! Cher。。。。o甘話我!!不過我都係唸下je。。。。
如果我要唔做護士去做代購，到底要賣幾多件衫先可以賺返我而家做護士o既錢呢?
一唸，都係乖乖地做返個護士仔算啦!

每日睇新聞都有好多有關雙非孕婦黎香港生仔既新聞!雖然我唔響香港做野又唔係港媽，但都睇到好眼火爆!! 唉~今日又話因為太多雙非衝急症攪到產房爆哂要D產後媽
同BB訓走廊!!OMG!!! 真係人都顛!!!
唉~幾年前響我仲未生小朋友之前，我係有強力o既決心帶D小朋友返香港讀幼稚園，直到佢地小學畢業先返悶蛋國架!目的係想佢地學下基本中文，唔好做一個唔識中文
o既ABC!!但係呢兩年睇到香港D媽媽同小朋友真係好大壓力!由懷孕開始就要擔心呢度無位，個度無奶粉，再過一兩年又要同人爭學位，又要學呢樣學個樣增值，真係好
登佢地辛苦!! 平來以為自己返黎做產科應該搵到食，因為個時仲未有好多大陸人落黎生!!唉~而家?我真係唸都唔敢唸要返黎做啦，我驚到時忙到見唔到我兩個寶貝!!應
該話係，見唔到NATTO，因為我如果響香港真係無o甘勇生埋KORI!! 太太大壓力啦!!! 我唔想佢地一出世就要同人爭呢樣爭個樣!
其 實雙非生仔呢家野唔係淨係香港先有，悶蛋國一樣有!!有好多比較聰明o既強國人(其實咩國藉o既人都有)就唔會衝去香港生仔同人爭床位，佢地會飛黎悶蛋國 生仔!!! 計落條數，分分鐘仲抵過響香港私家生，又唔駛爭，舒舒服服生完，小朋友就可以拎悶蛋國護照，好過拎香港身份証啦!!
悶蛋國o 既雙非都係生完個B，拍拍羅友就走~~跟住十零年後個小朋友讀中學啦就送返過黎免費浸咸水，爸爸媽媽一個仙稅都唔駛比!幾爽!!! 唉~奈何我地呢D乖乖交稅o既市民一樣係幫人養仔供書教學!!! 我之前做o既華人醫院，有差不多三分一雙非B呀! 不過佢地就好過香港D雙非少少，走數少D，同埋起碼唔會響房打邊爐同偷野!!
政府唔做野，基本上我地唯有硬著頭皮幫人養仔囉!! 大家加油呀!!希望有一日唔駛再為雙非勞氣啦!

最近無聊睇開BK一D講夫妻關係既Forum，發現原來好多夫妻都有婚姻問題!!有D就係老公有外遇，有D就係老公唔理屋企，夫妻無溝通，有D就係有左小朋友後因為太專注響小朋友身上，變左兩夫妻感情生疏!
有D"老公"留言話男人之所以包二奶，有外遇，係因為響老婆面前做唔到真男人(??) 老 婆唔夠二奶善解人意，溫柔體貼! 嘩~~我睇完之後即時比我老公睇，問佢同唔同意呢個男人講o既野! 佢話個男人想試圖將歪理變做真理! (即係佢唔同意) 不過我心裡忽然閃過一個念頭"如果男人包二奶係因為老婆唔夠溫柔，我唸我係高危一族啦!!死伙!!!有無溫柔班可以上呀??)
跟 住又有人話外表越老實o既男人就越有機會出軌!!!??死伙!!我老公都幾老實!!!! 我又屎忽痕響度唸如果有一日我老公有外遇會點。。。。。(我老公見到我個BLOG睇怕會即時彈句"女人就係o甘架啦，無野搵野黎唸!!!) o車!!! 唸下o者!!! 產前妄想囉!!得唔得!!??哈哈~~
老實講，我百分百相任我另一半!! 嫁得比佢，唔信佢信邊個?其實夫妻互相信任係絕對需要架，你估下我，我又懷疑下你有咩為呢? 兩個人有緣一齊就已經難得，
唔應該去做傷害對方o既事!! 將心比已就會知道咩應該做咩唔應該做!! 我堅決相信一個健康o既婚姻係百毒不侵，話知你二奶定小三，都無機會入手!
至於溫柔體貼嘛，要慢慢學!我自問無呢個天份，好似林志玲o甘"溫柔嫡嗲"! 不過有時屋企個件可以"man" D，屋企個女人就會自自然"比較溫柔"! 我相信好多惡女都係
"小女人"底o既(包括我!!嘩哈哈~) 有待開發je!!!

我今日睇左o個個佛山冷血18人o既Video，真係睇到想喊!!!身為一個媽媽，我無辦法理解解D人o甘冷血!!!好誇張好恐怖!!! 個小朋友比兩間貨車輾過呀!!!一個人，有血有肉，何況係一個小朋友，受左傷無人理，令到佢再被第二架車再輾多一次!!!痴左線!!!!
我身為一個中國人，我都覺得自己國家點解會有o甘可恥o既人，視人命如無物!如果呢十八個人都係人地o既父母，自己個小朋友因為旁人o既冷血而被車輾過兩次，佢地心裡面會有咩感受??
中國係就係越黎越強大，但係道德教育仍然需要一段長時間去改變!! sigh...................

Report abuse for this article
 

真係好鍾意呢首歌，送比每個因為感情問題而唔開心o既人~~
FACEBOOK真係一個好地方，除左朋友近況次外，朋友有時分享o既links，文章，歌都令人發人深省!!
今日有朋友post左梁靜茹o既一首舊歌，一聽返令我回想起幾年前失戀時o既一D情緒! 今日起碼聽左十幾次，原來已經過左o甘多年啦! 當年我仲係一個靚妹，為情所困，迷失過，傷心過仲以為自己會一沉不起，我唸呢D就係青春!!!而家唸返起覺得自己好攪笑!
不過D歌詞真係好正，"揮別錯的才能和對的相蓬"，幾年之後o既我找到對的了!!
希望呢位post歌o既朋友就算分唔分手都快D走過佢o既黑暗時代，重見光明!

Foie gras

Escargots

前晚我老公一晚叫左我睇星期日檔案三次,佢話呢集好得,好真好到題,我見佢講到o甘好睇,我仲以為係講親子關係,原來係講男人野!!
我一路睇一路笑,覺得裡面講o既野有D都幾o岩! 第二日,我老公再問我有無睇星期日檔案,於是我就話有睇,之後我問我老公:
你係咪覺得我似"港女"呀?
o甘又唔係!!
o甘你覺得呢集講o既野有咩你最認同呢?
(開始聲線肉緊) 其實男人真係好白痴好易tum架jar, 講野話一就一,唔似你地女人唸野o甘複雜!..................下刪十五分鐘討論內容!!!
我 認我某程度上都幾"港女"!! 好勝,唔認輸,唔識嗲人,唔識扮傻唔會口甜舌滑,唔太識tum人!! 可能我地兩個識於微時,我無太計較我另一半有無車有無樓有無錢比我渣手! 如果我而家仲係單身, 都不排除會將對方職業學識等等列埋入考慮因素,始終自己都有少少學歷,又有份不錯o既工作,如果一個律師一個地盤佬,o甘梗係做律師o個個都加D分啦! 但我都好同意我老公講, 愛情唔應該加入太多金錢原素,太過實際,愛情就會變質!! o甘當然如果地盤佬個人心地好,又同我夾又錫我,我唔排除會揀地盤佬而唔揀律師啦! 女人搵另一半,其實都係想找個倚靠,搵個人錫,搵個膊頭捱下je!!
男人話港女現實,其實而家D港男又何常唔係太現實呢!! 如果你唔係佢o既追求對象,唔駛旨意可以響佢地身上拎到一元八塊!!而家亦大把二三十歲o既港男毫無上進心可言,做人無主見.做野又hea, 有D屋企可能有D錢,唔駛養家個D就更Hea,求其有份工做就算, 對將來完全無concept,搵著呢D男人,分分鐘你要照顧返佢轉頭tim!!
我好興幸,我老公唔係"港男"!! 佢無嫌我打電話比佢煩, 佢唔駛同同事出街happy hour減壓,我從來唔需要"唔比"佢出去同朋友social,因為佢寧願留響屋企陪我地兩母子!!
為左報答我老公,我決定改下D"港女"性格,以後咩鬼都話唔識,盡可能扮蠢,咩野都比我老公做哂佢,然來再讚佢好叻好勁!!!嘩哈哈~~煮飯?我唔識架,掃地我唔叻架,不如全部你做哂la!
遲下星期日檔案應該做返集"偷聽女人心"至得~