小娜執媽的部落格

我好細個就出黎讀書,已經無同媽媽共住十年有多啦!!我媽媽比較嚴,細個時唔算好百厭o既我都食過唔少滕條炆豬肉!出國後無王管,好彩都無學壞!!

結婚前我仍然過住我想點就點o既生活,呀媽又住得o甘遠,無得管!!點知一結婚後,我人生出現左第二個呀媽,雖然無被滕條炆豬肉,不過屋企突然多左個鵝姐!!  呢個可愛o既鵝姐就係我老公啦!!

通常兩公婆,總有一個比較惡D,大家一睇樣就知邊個係惡野啦!!哈~ 我老公非常識得"遷就"我,我決定左要做o既野,通常佢唔會阻止我(應該話係無得阻止)!! 不過我亦唔能夠下下為所欲為,皆因我真係頂唔順佢成日鵝姐上身,比佢鵝多幾鵝,我就會唔做我本來想做o既野!!

好似年幾前未有Natto時,我好想買一隻手厄,雖然係唔平,但可以用幾次OT錢就買到,不過講左好多年都無買到!我話叫Natto BaBa送,佢話好呀!!等結婚十週年(定廿週年)就送比我!!! 等得黎都蚊訓!!!

之後呢一排我好想買部埃瘋,因為覺得好好玩,又好實用,不過跟台o既手機上網好貴,好似好唔化算,結果又係得個想字!! 其實我大可以硬係要出,不過算啦,而家有Natto,"精打細算"都好應該o既!! 最慘o既係有人公司出埋埃瘋比佢,佢有得用我無得用好慘架嘛!!!

我下年o既新年願望係有部埃瘋用下!! 唉~ 想當年我唔覺意講下想換某部電話,隔幾日就有人送比我啦!!真係今時唔同往日囉............