弱雞媽媽 vs 百厭仔－小娜執媽的部落格

真係渣屎!!!返工第二日je就比Natto投拆我!! 復工o既第一日唔算好忙﹐只係臨放工前45分鐘﹐我個patient媽媽用9秒9生左個B出黎令我有d雞手鴨腳﹐但呢一日總算平穩過左!

第二日返工唔夠三個鐘開始有d唔對勁﹐有微微m痛feel﹐個肚又成日硬﹐我知道我應該有宮縮!! 既然響醫院﹐當然自己monitor下係咪真係有宮縮先﹐費事係流料! 果然係有宮縮﹐不過唔係好痛﹐我知道自己應該唔係要生﹐但宮縮太密都唔正常所向老闆請假早退﹐去醫院檢查下穩陣d!

Call左Natto 爸爸﹐話佢知我要去醫院檢查因為子宮收縮﹐電話筒傳黎有d緊張o既聲音!一直以為我老公比我well train 成日聽埋d生仔野應該唔會驚﹐原來真係到自己o既時候都係會驚同緊張!

去到醫院﹐見返以前d同事﹐感覺親切﹐差d唔記得左自己響度作緊動!!!哈哈~ 一放monitor﹐嘩!!二到三分鐘一次宮縮﹐都嚇左自己一跳﹐因為唔算太痛﹐我都唔知原來驗收縮得o甘密!! 護士嬸嬸call醫生﹐即時打左針terbutaline ﹐作用係relax 子宮肌肉﹐等佢唔好收縮﹐不過副作用係心跳加速!!本身心都唔算好o既弱雞媽媽﹐打完呢針後個心真係跳到好似要彈出黎o甘﹐跟住仲手震震!! 之後又要響子宮頸拎d 分泌去做化驗 (Fetal Fibronectin(fFN)﹐睇下係咪有機會會早產!

由於我而家先27週﹐ 一旦Natto要出世﹐最擔心o既就係佢個肺﹐因為肺係BB最後一個成熟o既器官﹐佢而家出世個肺會太弱﹐所以醫生要我打兩支Betamethasone ﹐其實係d steriod﹐有保肺作用! 呢支針要打兩次﹐打完第一針﹐24小時後再補一針! 呢支針就真係惡頂﹐因為要打入肌肉﹐所以支針又長又粗! 打完之後又痛又痺!!我自己打人無數﹐今次比人打返﹐打之前都知死梗!! 打完一輪針後都未夠﹐仲要吊鹽水﹐因為hydration對宮縮都有幫助(所以各位準媽媽一覺得宮縮太密時﹐記得灌自己飲水)

可能我自己做呢行﹐知道大概會發生咩事﹐我亦深信今次只係Natto百厭嚇下我地﹐唔係真係要出黎﹐所以整個入院出院過程我都算振定﹐係嚇親我老公同奶奶! 真係唔好意思~

經過今次後﹐我醫生決定要我提早放產假!! 我都預左架啦﹐不過無預o甘早je!! 各位要做粗重野o既媽媽真係要萬分小心﹐大肚婆真係唔可以太操勞!!

在此要多謝我o既貼身呀四honey﹐24/7貼身服待我呢個弱雞媽媽!!仲有我奶奶﹐比我地嚇親之後仲要拿拿臨煲桑寄生比我安胎!! 同埋各位關心我o既Blog友仔﹐朋友仔﹐要大家擔心啦!!!