小娜執媽的部落格

小朋友跌親十常八九, 我呀媽話細佬仔唔跌唔大,不過當發生響自己個仔身上,個心仍然會赤赤痛!!

案發地點: 我地睡房

案發時間: 晚上十一點幾

案 發經過: 事緣我去左沖涼,我老公去左廚房開奶!! Natto BaBa將Natto打橫放左響我地張大床!如果枕頭位係12點,Natto頭仔係向著3點位,不過佢係o訓響床中間! Natto BaBa太過輕視Natto而家o既活動能力(其實我都係),大安旨意上左去開奶,我又沖緊涼!! 大家梗係以為案發時間係響我沖緊涼o個陣!!唔係囉!!我沖涼沖左廿分鐘,出到房仲見到Natto 響大床,不過成個人已經郁左少少向床邊!我覺得奇怪,點解我老公開奶開o甘耐,唔通開開下奶o訓著左? 於是我就上去睇下我老公攪咩鬼!!(離開房門個一刻我都有唸過Natto會唔會橕左落床,但我心唸點會o甘快,我上一上去都唔會超過一分鐘) 當我去到廚房查察我老公攪咩o甘耐都未得時,說時遲那時快我已經聽到喊聲啦!!!!大穫!!!!唸一唸都中,六合彩又唔見中!!!

心都亂哂衝入房,九秒九抱返起個仔!!Natto喊到好淒涼呀!!!!我檢查哂全身,無"起樓"無流血無損傷!!!好彩!!! 不過我都好自責,明知佢而家郁得勁左,唔應該獨留佢響大人床!! 佢而家經常拱橋拱拱下由床尾拱上床頭!! 以後真係每分每秒都要睇到實!!

案發後o個日我返工,唸返起個心都實一實!!!心痛ing!~~

之 後我奶奶問我入到房係見到Natto頭掂地定身掂地,我居然完全唔記得!!!我當時淨係知要抱返起個仔,呵返佢!!可見我當時幾六神無主!! 唉~而家跌一跌都已經o甘心痛,第日大D撞穿頭入廠我都唔知會點啦!! (睬睬睬!!!)