小娜執媽的部落格

年齡永遠都同女性有千絲萬縷o既關係﹐亦係生BB o既最大敵人﹗﹗25歲女性響6個月內懷孕的機會是75%，30歲是45%，40歲就只有25% !!所以仔一定要趁嫩生!

除 此之外身體健康良好﹐體重唔好太重亦唔好過瘦!太重同太瘦都可能會影響卵巢功能阻礙正常排卵! 準媽媽要健康﹐準爸爸都係一樣!如果有食煙飲酒習慣就要戒除﹐或者減少﹐因為呢D壞習慣會令精子質素下降! 大家都可能知道﹐精子好怕熱﹐所以準爸爸響準備有BB之前一定唔可以浸溫泉﹐要盡量令下身保持清涼﹐唔好著三角褲,著孖煙通比較好!

準 媽媽方面要了解自己o既生理cycle! 女性o既生理cycle 係好複雜﹐我自己都睇左好耐書先完全明白!不過重點就係正常cycle大概28-35日為一週期﹐生理期為3-7日﹐唔會有嚴重經痛或者不適!(如果經痛 嚴重﹐好可能係有子宮內膜移位﹐呢個都係不育o既原因之一) 我以前一直誤會女性係響Day14排卵﹐原來係大錯特錯!!平時d書話Day14排卵只係講緊以一般28日o既cycle計算﹐每個女性o既月經週期長短 不一﹐排卵亦未必個個響第14日!!不過有一樣野可以肯定o既係排卵後o既12-16日﹐如果無懷孕o既話月經一定會黎架啦!因為排卵後本來用黎包住卵子 o既濾泡就會變成黃體﹐黃體會分泌孕同(progesterone)﹐作用係令子宮內膜增厚準備比受精卵著床﹐若果真係懷孕﹐孕同就會話比大腦知已經中左 獎唔駛再排卵同埋唔比子宮內膜脫落令M小姐黎唔到! 而孕同o既壽命係fix o既(12-16日)﹐唔會比較外來因素影響到(例如心情﹐身體狀況等等)﹐所以只要你知道你幾時排卵﹐就會知道M小姐幾時黎啦!

飲食要圴衝﹐準備懷孕前3個月開始食葉酸(Folic acid) 可預防BB患嚴重腦畸形!當然最好做適量運動啦(雖然我都無)

o甘點知幾時排卵呢?

你 可以透過葯房買到o既排卵捧﹐好似驗孕o甘﹐如果有排卵就會出現兩條線! 原理係身體響排卵期時會有種hormone叫做Luteinizing hormone(LH)分泌﹐當LH去到最高峰時就會比左message大腦﹐同佢講可以將粒待排出黎啦!排卵捧就係detect LH surge(高峰)﹐通常當LH去到高峰點後12-36鐘頭裡面就會排卵架啦! 準媽媽就可以透過排卵捧知道幾時排卵從而可以重點出擊啦!

另 外接近排卵期時﹐雌激素(estrogen)會令子宮頸分泌變得好稀﹐有d似蛋白o甘﹐透明有伸展性(有D似一條長鼻涕)如果留心o既話﹐同平時分泌係有 明顯分別架!準備懷孕o既朋友仔亦應該養成量體溫o既習慣﹐除左可以知道自已幾時排卵外亦可以從體溫得知自己有無排卵! 方法係由月經黎開始每日同一時間一起身咩都唔好做就量體溫﹐mark起佢!你會發現月經開始到排卵前體溫會偏低﹐排卵後就會變高溫(大概高0.5度)跟住 月經黎時又會變返低溫!排卵日通常出現響高溫出現o既前一日!

嘩!!唔覺唔覺打左好多字tim!! 其實以前我都以為自己好了解自己個Cycle﹐原來我只係一知半解!呢次準備懷孕令我睇左好多書﹐而家終於叫做了解啦!

最 後一樣最重要又最難做o既就係放鬆心情啦!!!生BB一定要平常心﹐因為越想有就越比壓力自己!!壓力會影響心情﹐影響cycle﹐就算卵子好彩受精都未 必會成功著床所以心情好緊要!!好多人就係越想有就越無﹐一話放棄就成功!原來都係因為心情放鬆左﹐身體就會容易d懷孕!!

如果兩夫婦有正常性生活超過一年都未成功懷孕就要快d去睇醫生﹐睇下係咪出現咩問題啦!大家要記住時間係生BB o既重要因素之一﹐唔好拖啦﹐如果有問題o既話早日治療係好緊要架!

希望呢少少資料幫到準備懷孕o既朋友仔啦!唔打啦﹐要去煮飯啦!!