東京近郊@江之島+鐮倉－小娜執媽的部落格

黎到日本旅行shopping係在所難免﹐但係要我地日日涉谷原宿行足o甘多日就肯定會死人﹐荷包先死!去近郊行下食下比較輕鬆D﹐所以我地今次旅行去左唔少公園同埋一個小遠行-->江之島~

由新宿直接搭小田急特急車就可以去到藤伬再轉江之島線一個鐘就會到江之島!同搭浪漫特快o既時間差不多﹐價錢平少少!不過就要停幾個站同有可能無位坐!其實我會鍾意坐浪漫特快多D因為唔駛轉車﹐架車又新又舒服﹐黎到近郊遠行都係想relax下﹐無謂同人迫車啦!但係浪漫特快班次比較疏d﹐所以要上網check定schedule先去車站!同埋記得要買江之島週遊票﹐抵好多架!!連去江之島o個程特急車﹐去到江之島後搭o既江之電都包埋﹐慳返唔少!

江之島有沙灘又有好多寺廟又有好多鋪頭仔買海產小食﹐要大半日先行得完!佢地最出名係海螺﹐街邊到處都有燒螺肉﹐仲有燒大蜆﹐對我呢D喜歡海鮮o既人簡直係天堂!超級推介江之亭o既螺蛋飯﹐嘩嘩嘩!!D蛋滑到不得之了﹐海螺又鮮到暈﹐超好味!簡直係meal of the day!而我地仲叫左一set 大蜆+海螺Sashimi 套餐2500yen 有兩隻燒大蜆又有海螺Sashimi﹐都係推介之選!!對住一望無際o既海邊食呢個螺蛋飯當堂感動到兩行眼淚~~

要行江之島o既寺廟同埋小鋪仔係要行好多樓梯﹐如果唔想行可以比300yen用佢地o既電梯~ 如果上埋展望塔就要750yen~ 不過只包上﹐落山都係要行路!!

行完江之島之後太陽伯伯就收工啦﹐所以我地拿年聲坐江之電去鐮倉睇埋佢個大佛﹐雖然無咩特別﹐不過一場後黎到無理由唔去~入場費200yen﹐比我地見到d水尾紅葉!!

整個江之島同鐮倉比我o既感覺都有D似箱根﹐比較鄉土人情﹐又有好多小店買唔同o既食品同用品﹐比起城市o既東京輕鬆好多!!