新加坡喪食之旅第一天 @ 小娜執媽的部落格

玩完馬爾代夫好多人都跟手去埋新加坡!!!因為離開馬代一定會經過新加坡轉機!我地都一樣﹐順道玩左3日2夜﹐主要此行以食食食同食為主!

新加坡旅遊局最近有好多旅遊優惠比外國人﹐好似機場免費接送到指定酒店﹐又比好多市內觀光﹐旅遊景點o既優惠票我地﹐所以好多地方都唔駛錢入場!人人都話新加坡係一個整潔o既城市﹐其實又無我想像中o甘乾淨﹐不過比起香港就企理好多啦!

第一日我地當然去左食出名o既天天海南雞飯!!(於牛車水chinatown o既maxwell food centre)天氣好熱﹐加上身處o既熟食區又冷氣﹐我地為左食呢個海南雞飯足個排左40分鐘﹐與此同時我又走去排魚湯米粉(全場最多人排o既兩間﹐心唸多人排實好食) 最後果然無令我地失望﹐好好味呀!!我老公話個雞飯食完即時有好窩心幸福o既感覺(有無o甘誇呀!!) 都不枉我地排左o甘耐!

之後就坐船仔遊市中心各個旅遊點!< >其實新加坡真係好細﹐如果唔怕大熱天時行路﹐所有景點沿住新加坡河用行路都會到o既!好似魚尾獅公園﹐克拉碼頭﹐濱海藝術中心(即係大榴槤)﹐萊佛士酒店等等﹐一條路就到!

去完鴨仔團必到o既景點之後﹐我地就去左老巴剎開餐!老巴剎係唯一我見到響新加坡o既戶外food centre﹐感覺有d似響中環商業區中心多左個大排擋o甘﹐周圍都係商業大廈﹐感覺好奇怪!呢度主要都係賣著名o既小食﹐串燒﹐炒海鮮﹐海南雞飯....etc好多野食架!食飽飽後我地就搭地鐵(MRT)再食過﹐哈哈!!!呢次去左牛車水食街邊野之後先捨得返酒店!!

其實新加坡o既地鐵同香港o既MTR都有D似﹐都好容易搭﹐好方便!!不過買車票就要每次都比一蚊坡子按金﹐每次搭完要去售票機度退錢﹐呢樣就唔算太方便﹐如果大頭蝦d﹐就會唔記得退錢﹐比多一蚊啦!