小娜執媽的部落格

每次睇，每次感動!

今日係我地結婚三週年紀念! 由於上次"唔等洗事件"，所以我今年真係無準備禮物! 如常會食餐好o既當慶祝，不過今日間餐廳休息，聽日先補返個Anniversary Dinner!!

原來已經三年啦!!

呢三年好似好短但又好似已經做左好多野!!頭一年，二人世界，想快D添個家庭成員，點知等左成年都無料到! 差D以為我地要二人世界過埋下半世
(心唸o甘咪好悶?)不過第一年過左一個係o甘去旅行o既快樂時光，日本，馬爾代夫，新加坡，台灣~兩個人自由自在，去邊都得!

第二年，Natto面世，陪我地過結婚週年!三個月人仔，成舊綿花糖o甘! 呢一年初為人父母，專注湊仔，時間過得好快，轉眼Natto已經一歲啦!! 呢一年好忙，但係過得好開心!!

踏入第三年啦，意想不到天父再賜比我地一個小天使，Kori! (雖然佢未出世己經成個頂心杉，頂到我氣都透唔順)我發夢都無唸過自己會三年抱兩!!哈哈~~一家兩口變四口!!! 生活除左忙同開心，我都唸唔到其他野去形容啦!!

雖然我唔係徐子淇，但係我好肯定自己嫁得好!! 我無附屬黑金咭，但係我老公會響我陀BB時幫我做哂D家務(90%都係佢做)，其實未陀B之前都係佢做多!! 放工返屋企
已經好累仲堅持會幫Natto沖涼，等我唔駛o甘辛苦!! 我相信呢樣野李家誠肯定無做(人地有工人嘛，我知oY，但o個份心意已經夠啦)

多謝你包容我呢個十大惡人!!! 特別係今次陀Kori，辛苦你啦!我知我平時已經好難頂，但陀埋Kori簡直係一個萬世long黎+極度難相處o既臭四!忍左快十個月，辛苦哂!!! 生完之後，我會盡量補償你，做你呀四。。。。一陣o甘多啦!!嘻嘻~^^

以後o既日子會好忙好辛苦，不過我地兩個互橕啦!!一齊加油啦!!Fighting!!!!!