胎盤前置(Placenta Previa) @ 小娜執媽的部落格

77tL6pmJ.U06ilzqOnYNCQ

自從生左Natto後，我個OB小百科好似棄置左，好耐都無新貢獻啦!! 湊仔真係一份24/7 o既Full-time job!!其實有好多OB topics想講，不過又想記多D Natto成長日誌!!
不如等我講下上回我去睇完OB後被嚇一跳，因為醫生話我有胎盤前置o既事! 其實都唔係第一次話我有，因為12週時照頸皮時，產前專科醫生(perinatologist)己經照到我有少少胎盤前置，不過今次我自己OB照仲話我個胎盤越生越低，"Com"住左個子宮頸tim! 但萬幸我18週照結構時，產前專科醫生又話無事啦!!大家係咪聽到頭暈暈呢?哈哈~

其實胎盤前置(Placenta previa)即係胎盤生得低，低到痴住子宮頸，或者蓋過子宮頸! 正常胎盤應該生響子宮o既上方，掂到子宮頸，或者生得太近子宮頸都係唔正常!! 因為子宮頸係BB出世o既必經地，如果胎盤生響個度，就會阻住BB出世，同時胎盤係一個充滿血管而且非常敏感o既器官，只要少少衝激就好容易導致出血，所以通常胎盤前置o既媽媽都要開刀生產以減少生產時大出血o既危險!

而胎盤前置大概分為三種: Complete previa， Marginal/Partial previa，同埋Low-lying previa!!

Complete previa就係胎盤完全蓋過子宮頸，係最危險最容易出血o既一種，一定要開刀生產!Marginal/partia previa就即係胎盤掂到少少子宮頸，無Complete o甘危險但都要開刀!Low-lying previa就係胎盤生得太近子宮頸，雖未至於掂到，但當生產時子宮頸張開就有機會觸及胎盤!! 同樣地逃不過要開刀!!!

嘩!!!o甘我係咪要開刀啦?? 其實懷孕初期照到有胎盤前置係唔駛太擔心o既~~因為胎盤會隨住子宮生長膨脹而移位，情況就好似你放粒糖仔入個汽球裡面，當你吹脹汽球時，粒糖係會移位一樣!! 要差不多Second trimester後期都仍然仲照到有胎盤前置先可以叫做真正o既胎盤前置!!!

咩人會容易有胎盤前置呢?

上一胎試過有胎盤前置o既，曾經開刀生過o既，食煙o既，做過子宮手術o既，懷有孖胎o既媽媽都比較易有胎盤前置!!

萬一真係有胎盤前置既點算呀?

無點算架啦，開刀囉!!! 不過要特別小心唔好操勞，以致刺激到胎盤導致出血!! 爸爸媽媽要禁慾直至BB出世啦! 萬一作早產或者大吉利是要入院，記得話比姑娘聽你有胎盤前置，等佢地唔好做內陰檢查(vaginal exam)，因為內陰檢查都有可能導致出血!!

而胎盤前置o既媽媽產後都要特別留意產後出血o既情況，因為由於胎盤生得低，當胎盤產出之後，原本痴住胎盤o既位置就好似一個傷口o甘會流血，產後子宮係透過本身o既肌肉收縮去止血，但子宮低部o既肌肉無子宮其他地方o甘好o既收縮能力，所以比較易出血!

希望我個胎盤仔生生性性，唔好再"移民"去我子宮頸啦!!我唔想開刀呀!!!